Home WORLD జపాన్ ట్విట్టర్ కిల్లర్.. సోషల్ మీడియాలో పరిచయంతో తొమ్మిది హత్యలు

జపాన్ ట్విట్టర్ కిల్లర్.. సోషల్ మీడియాలో పరిచయంతో తొమ్మిది హత్యలు

11
0

సోషల్ మీడియా ద్వారా పరిచయం పెంచుకుని, తొమ్మిది మందిని హత్యచేసిన జపాన్ ట్విట్టర్ కిల్లర్‌ తకాహిరొ షిరాయిషిను న్యాయస్థానంలో బుధవారం ప్రవేశపెట్టినట్టు స్థానిక మీడియా తెలిపింది. కానీ, బాధితుల సమ్మతితోనే ఈ హత్యలు చేశాడని నిందితుడి తరఫు లాయర్ వాదించడం గమనార్హం. ఆత్మహత్య చేసుకోవాలనే ఆలోచనలు అతడితో పంచుకోవడం వల్లే హత్యలు చేశాడని వాదించాడు. హత్యచేసిన తర్వాత బాధితుల శరీరం భాగాలు చేసి, వాటిని కూల్ బాక్సుల్లో భద్రపరిచినట్టు తేలింది. అతడిపై హత్య కేసుతోపాటు అత్యాచారం కేసు నమోదయ్యింది.

మానసిక వేదనతో ఆత్మహత్య చేసుకోడానికి సిద్ధంగా ఉన్న15-26ఏళ్ల మధ్య వయస్కులను నరహంతకుడు షిరాయిషి ట్విట్టర్ ద్వారా సంప్రదించినట్టు ఆరోపణలు ఉన్నాయి. ఆత్మహత్య ఎలా చేసుకోవాలో సహకరిస్తానని, తాను కూడా చనిపోవడానికి సిద్ధంగా ఉన్నట్టు వారిని నమ్మబలికి హత్యలు చేసినట్టు కేసు నమోదయ్యింది. ఈ కేసులో దోషిగా తేలితే షిరాయిషికి ఉరిశిక్ష విధిస్తారు.

నిందితుడి తరఫు లాయర్ మాత్రం.. బాధితుల సమ్మతితోనే వారి చావునకు సహకరించాడని, అతడికి ఆరు నెలల నుంచి ఏడేళ్ల వరకు శిక్ష విధించాలని కోరాడు. అయితే, షిరాయిషి మాత్రం ఈ వాదనలు సరైనవి కాదని, ఎటువంటి అనుమతి తీసుకోకుండానే హత్యలు చేశానని వెల్లడించాడు. బాధితుల తల వెనుక భాగంలో గాయాలు ఉన్నాయి… అంటే దీని అర్థం సమ్మతి లేదని, వారు ప్రతిఘటించలేదని అన్నారు.

తాను ఆత్మహత్య చేసుకోవాలని భావిస్తున్నట్టు ట్విట్ చేసిన ఓ 23 ఏళ్ల మహిళ కనిపించకుండా పోవడంతో మూడేళ్ల కిందట షిరాయిషి హత్యలు బయటపడ్డాయి. సదరు మహిళ కనిపించకుండా పోయిన తర్వాత బాధితురాలి సోదరుడికి అనుమానం వచ్చి ఆమె ట్విట్టర్ ఖాతాను తెరవగా విషయం వెలుగులోకి వచ్చింది. పోలీసులకు ఫిర్యాదు చేయడంతో కేసు నమోదుచేసి, దర్యాప్తు చేపట్టారు.

షిరాయిషీతో ఆమె తరుచూ ట్విట్టర్‌లో సంప్రదించినట్టు గుర్తించి, అతడిని అదుపులోకి తీసుకున్నారు. విచారణలో నిందితుడి ఇంటి కింది భాగంలో ఓ రహస్య గదిని బయటపడగా.. అందులో 9 మృతదేహాలను గుర్తించారు. అందులో ముక్కలుగా చేసిన శరీర భాగాలు, 240 ఎముకలను బాక్సుల్లో దాచి ఉంచాడు. ప్రపంచంలోని పారిశ్రామికంగా అభివృద్ధి చెందిన ఏడు దేశాల్లో జపాన్‌లోనే అధికంగా ఏడాదికి 20వేల మంది ఆత్మహత్యలు చేసుకుంటున్నారు.

LEAVE A REPLY

Please enter your comment!
Please enter your name here