IPL 2020: ముంబయి టార్గెట్ ఆ 4 ఓవర్లే.. గేమ్ ప్లాన్ చెప్పేసిన పొలార్డ్
IPL 2020: ముంబయి టార్గెట్ ఆ 4 ఓవర్లే.. గేమ్ ప్లాన్ చెప్పేసిన పొలార్డ్

ఐపీఎల్ 2020 సీజన్‌లో ముంబయి ఇండియన్స్ పవర్ హిట్టర్ కీరన్ పొలార్డ్ సూపర్ ఫామ్‌లో కొనసాగుతున్నాడు. గత సోమవారం రాయల్ ఛాలెంజర్స్ బెంగళూరుతో జరిగిన మ్యాచ్‌లో కేవలం 24 బంతుల్లోనే 3 ఫోర్లు, 5 సిక్సర్ల సాయంతో 60 పరుగులు చేసిన కీరన్ పొలార్డ్.. కింగ్స్ ఎలెవన్ పంజాబ్‌తో గురువారం రాత్రి జరిగిన మ్యాచ్‌లోనూ 20 బంతుల్లో 3 ఫోర్లు, 4 సిక్సర్ల సాయంతో 47 పరుగులు చేశాడు. ఈ రెండు మ్యాచ్‌ల్లోనూ చివరి బంతి వరకూ క్రీజులో ఉన్న పొలార్డ్ స్లాగ్ ఓవర్లని టార్గెట్‌గా చేసుకుని భారీ షాట్లతో చెలరేగిపోయాడు.

బంతి ఎలాంటిదైనా తన భుజబలంతో స్టాండ్స్‌లోకి తరలించగల సామర్థ్యం ఉన్న కీరన్ పొలార్డ్‌ని ముంబయి ఇండియన్స్ చాలా తెలివిగా వాడుకుంటోంది. మ్యాచ్ గమనానికి అనుగుణంగా పొలార్డ్ బ్యాటింగ్ ఆర్డర్‌ని మారుస్తున్న ముంబయి.. చివరి 4 ఓవర్లలో అతను ఎక్కువ బంతులు ఆడేలా ప్లాన్ చేస్తోంది. దాంతో.. ఊహించని విధంగా ఆ జట్టు ఆఖర్లో పరుగులు రాబడుతోంది. ఎంతలా అంటే..? కింగ్స్ ఎలెవన్ పంజాబ్‌తో మ్యాచ్‌లో ముంబయి ఇండియన్స్ ఆఖరి 30 బంతుల్లో ఏకంగా 104 పరుగులు పిండుకుంది. మరీ ముఖ్యంగా.. ఇన్నింగ్స్ చివరి ఓవర్ వేసిన స్పిన్నర్ గౌతమ్ బౌలింగ్‌లో ఆఖరి మూడు బంతుల్నీ పొలార్డ్ సిక్సర్లుగా మలిచేశాడు. ఈ ఓవర్‌లో గౌతమ్ 25 పరుగులు సమర్పించుకోగా.. మ్యాచ్‌లో ఇదే కీలకమలుపు.

మ్యాచ్‌ని మలుపు తిప్పే ఇన్నింగ్స్ ఆడిన కీరన్ పొలార్డ్‌కి మ్యాన్ ఆఫ్ ద మ్యాచ్ అవార్డు లభించగా.. స్లాగ్ ఓవర్లలో హిట్టింగ్‌పై కీరన్ పొలార్డ్ మాట్లాడాడు. ‘‘స్లాగ్ ఓవర్లలో ఎవరు బౌలింగ్ చేస్తున్నారో చూసి.. ఎన్ని పరుగులు రాబట్టగలనో ముందే ఓ అవగాహనకి వస్తాను. టార్గెట్ 15 పరుగులు అనుకుంటే..? గట్టిగా హిట్టింగ్ చేయాల్సి ఉంటుంది. పంజాబ్‌పై మ్యాచ్‌లో హార్దిక్ పాండ్యా కూడా హిట్టింగ్ చేయడం కలిసొచ్చింది. మ్యాచ్‌ చివరి 4 ఓవర్లలో ఆకాశమే హద్దని మాకు తెలుసు’’ అని పొలార్డ్ వెల్లడించాడు.

LEAVE A REPLY

Please enter your comment!
Please enter your name here