CSKకి సురేశ్ రైనా శాశ్వతంగా దూరం..! వచ్చే ఏడాది వేరే జట్టు తరఫున..?
CSKకి సురేశ్ రైనా శాశ్వతంగా దూరం..! వచ్చే ఏడాది వేరే జట్టు తరఫున..?

వ్యక్తిగత కారణాలతో ఐపీఎల్ 2020 నుంచి అనూహ్యంగా వైదొలిగిన సురేశ్ రైనా.. మళ్లీ చెన్నైకు ఆడే అవకాశాలు కనిపించడం లేదు. యూఏఈ వెళ్లిన రైనా.. ‘వ్యక్తిగత కారణాలతో’ ఐపీఎల్ ప్రారంభానికి ముందే భారత్ వచ్చేసిన సంగతి తెలిసిందే. ఇండియాకు వచ్చిన తర్వాత రైనా.. తిరిగి ఈ సీజన్లోనే చెన్నై తరఫున ఆడతాననే సంకేతాలిచ్చాడు. కానీ సూపర్ కింగ్స్ మాత్రం.. ఆ దిశగా ఆలోచించడం లేదని స్పష్టం చేసింది. ఇటీవలే రైనా పేరును తమ వెబ్‌సైట్లోని ఆటగాళ్ల జాబితా నుంచి తొలగించింది.

ఈ ఐపీఎల్ సీజన్‌కు దూరం కావాలని రైనా, హర్భజన్ నిర్ణయించుకోవడంతో.. వారి ఐపీఎల్ కాంట్రాక్టులు రద్దయ్యే అవకాశం కనిపిస్తోంది. వీరిద్దరి కాంట్రాక్టులను తొలగించే ప్రక్రియను సూపర్ కింగ్స్ ప్రారంభించినట్లు సమాచారం. కాంట్రాక్టులను రద్దు చేస్తే వీరికి ఫ్రాంచైజీ డబ్బులు చెల్లించాల్సిన అవసరం ఉండదు. రైనాకు సీఎస్‌కే రూ.11 కోట్లు వేతనంగా ఇస్తుండగా.. 2018లో హర్భజన్ సింగ్‌ను యెల్లో ఆర్మీ రూ.2 కోట్లకు కొనుగోలు చేసింది.

చెన్నై సూపర్ కింగ్స్ కాంట్రాక్టులను రద్దు చేసుకుంటే.. వచ్చే సీజన్లో రైనా, హర్భజన్‌లను వేరే ఫ్రాంచైజీలు కొనుగోలు చేయొచ్చు. 2021 సీజన్ కోసం భారీ వేలం జరిగే ఛాన్స్ లేకున్నా.. వేలం ప్రక్రియ మాత్రం జరుగుతుంది. దీంతో రైనా భారీ ధరకు అమ్ముడుపోయే అవకాశం ఉంది.

ఐపీఎల్‌లో 193 మ్యాచ్‌లు ఆడిన రైనా.. ఇండియన్ ప్రీమియర్‌ లీగ్‌లో 5 వేల పరుగుల మైలురాయిని చేరుకున్న తొలి క్రికెటర్‌గా రికార్డు క్రియేట్ చేశాడు. ఐపీఎల్‌లో అత్యధిక మ్యాచ్‌లు ఆడిన రికార్డు కూడా అతడి పేరిటే ఉండేది.

LEAVE A REPLY

Please enter your comment!
Please enter your name here