ఐపీఎల్‌లో మాక్స్‌వెల్‌కి ఏమైంది..? క్రిస్‌గేల్‌ ఎంట్రీకి రూట్ క్లియర్
ఐపీఎల్‌లో మాక్స్‌వెల్‌కి ఏమైంది..? క్రిస్‌గేల్‌ ఎంట్రీకి రూట్ క్లియర్

ఐపీఎల్ 2020 సీజన్‌కి భారీ అంచనాల నడుమ అడుగుపెట్టిన కింగ్స్ ఎలెవన్ పంజాబ్ పవర్ హిట్టర్ గ్లెన్ మాక్స్‌వెల్.. పేలవ ఫామ్‌తో విమర్శలు ఎదుర్కొంటున్నాడు. తాజా సీజన్‌లో ఐదు మ్యాచ్‌లాడిన మాక్స్‌వెల్ చేసిన పరుగులు 41 మాత్రమే. బౌలర్ ఎవరైనా తనదైన గోల్ఫ్ షాట్స్‌తో బంతిని స్టాండ్స్‌లో తరలించే సామర్థ్యం ఉన్న మాక్స్‌వెల్.. ఈ తరహాలో విఫలమవుతుండటం పంజాబ్ టీమ్ విజయావకాశాల్ని దారుణంగా దెబ్బతీస్తోంది.

చెన్నై సూపర్ కింగ్స్‌తో దుబాయ్ వేదికగా ఆదివారం రాత్రి జరిగిన మ్యాచ్‌లో ఇన్నింగ్స్ 18వ ఓవర్‌లో క్రీజులోకి వచ్చిన మాక్స్‌వెల్ 7 బంతులు ఎదుర్కొన్నా.. కనీసం ఒక్క బంతిని కూడా బ్యాట్‌కి మిడిల్ చేయలేకపోయాడు. మరీ ముఖ్యంగా.. లెగ్ స్టంప్‌కి అవల అతను స్టాన్స్ తీసుకోవడంతో చెన్నై బౌలర్లు తెలివగా ఆఫ్ స్టంప్‌ లైన్‌పై బంతులు సంధించి కట్టడి చేశారు. దాంతో.. ఒకానొక దశలో 190 స్కోరు చేసేలా కనిపించిన పంజాబ్ 178 పరుగులతో సరిపెట్టుకోగా.. చెన్నై ఓపెనర్లు 17.4 ఓవర్లలోనే వికెట్ పడకుండా లక్ష్యాన్ని ఛేదించేశారు.

ఆల్‌రౌండర్‌గా టీమ్‌కి మాక్స్‌వెల్ ఉపయోగపడతాడని ఆశించిన కింగ్స్ ఎలెవన్ పంజాబ్ ఫ్రాంఛైజీ.. వేలంలో అన్ని ఫ్రాంఛైజీలతో పోటీపడి మరీ రూ. 10.75 కోట్లకి కొనుగోలు చేసింది. కానీ.. బ్యాట్‌తో విఫలమవుతున్న ఈ హిట్టర్.. బౌలింగ్‌లోనూ ఈ ఐదు మ్యాచ్‌ల్లో కలిపి తీసింది ఒక వికెట్ మాత్రమే. దాంతో.. మాక్స్‌వెల్‌పై వేటు గురించి కింగ్స్ ఎలెవన్ పంజాబ్ టీమ్‌లో చర్చ మొదలైనట్లు తెలుస్తోంది. అదే నిజమైతే క్రిస్‌గేల్‌కి రూట్ క్లియరైనట్లే..!

పంజాబ్ జట్టులో ఓపెనర్లుగా కేఎల్ రాహుల్, మయాంక్ అగర్వాల్ నిలకడగా రాణిస్తున్నా.. క్రిస్‌గేల్ కోసం ఈ ఇద్దరిలో ఒకరు తమ ఓపెనింగ్ స్థానాన్ని త్యాగం చేయాల్సి ఉంటుంది. ఐపీఎల్ 2020 సీజన్‌లో పంజాబ్ ఇప్పటి వరకూ 5 మ్యాచ్‌లాడగా.. రెండింటిలో మాత్రమే గెలుపొందింది. ఐపీఎల్‌లో అద్భత రికార్డులున్న గేల్‌కి తాజా సీజన్‌లో ఒక్క మ్యాచ్‌లో కూడా పంజాబ్ అవకాశం ఇవ్వలేదు. అయితే.. సరైన టైమ్‌లో గేల్‌కి తుది జట్టులో ఛాన్సిస్తామని ఇటీవల కెప్టెన్ కేఎల్ రాహుల్ చెప్పిన విషయం తెలిసిందే. కింగ్స్ ఎలెవన్ పంజాబ్ తర్వాత మ్యాచ్‌ని సన్‌రైజర్స్ హైదరాబాద్‌తో గురువారం ఆడనుంది.

LEAVE A REPLY

Please enter your comment!
Please enter your name here