కోవిడ్-19పై అవగాహన కార్యక్రమం.. ‘జన్ ఆందోళన్’ ప్రారంభించిన మోదీ
కోవిడ్-19పై అవగాహన కార్యక్రమం.. ‘జన్ ఆందోళన్’ ప్రారంభించిన మోదీ

రాబోయే రోజుల్లో దసరా, దీపావళి సహా పండుగల సీజన్ కావడంతో జనం పెద్ద ఎత్తున ఒకే చోట చేరడం సహా చలికాలం సమీపిస్తున్న వేళ కరోనా వైరస్‌ మహమ్మారి మరింతగా విజృంభించే ప్రమాదం ఉంది. ఈ నేపథ్యంలో కొవిడ్‌-19 లక్ష్యంగా ప్రజల్లో అవగాహన కల్పించేందుకు కేంద్ర ప్రభుత్వం ‘జన్‌ ఆందోళన్‌’ పేరిట ఓ ప్రత్యేక ప్రచార కార్యక్రమానికి రూపకల్పన చేసింది. ఈ కార్యక్రమాన్ని గురువారం ప్రధాని నరేంద్ర మోదీ ట్వీట్‌తో ప్రారంభించారు. ‘కరోనాతో పోరాటానికి ఏకం చేద్దాం..ఎల్లప్పుడూ గుర్తుపెట్టుకోండి.. మాస్క్ ధరించండి, చేతులు శుభ్రంగా ఉంచుకోండి.. కనీసం రెండు గజాల భౌతిక దూరం పాటించండి’ అని ట్వీట్ చేశారు.

పండుగలు, ఇతర కార్యకలాపాల దృష్ట్యా కరోనా నియంత్రణకు ప్రజల్లో భాగస్వామ్యాన్ని ప్రోత్సహించేందుకు ఈ కార్యక్రమం చేపడుతున్నట్టు కేంద్రం తెలిపింది. తప్పనిసరిగా మాస్క్‌ ధరించడం, భౌతికదూరం పాటించడం, చేతుల్ని శుభ్రం చేసుకోవడం ఆవశ్యకతను వివరించే సందేశంతో ఈ ప్రచార కార్యక్రమం కొనసాగనుంది. వైరస్‌ తీవ్రత అధికంగా ఉన్న ప్రాంతాలను లక్ష్యంగా చేసుకొని ప్రతి పౌరుడికి సరళంగా, సులభంగా అర్థమయ్యేలా సందేశాలను రూపొందించారు.

మీడియా వేదికలను ఉపయోగించుకోవడం సహా కరోనాపై ముందుండి పోరాటం చేస్తున్న యోధులతో పాటు బహిరంగ ప్రదేశాల్లో బ్యానర్లు, పోస్టర్లు అతికించడం, సంక్షేమ పథకాల లబ్ధిదారులను ఈ ప్రచారాన్ని ప్రజల్లో విస్తృతంగా చేయనున్నారు. ప్రభుత్వ స్థలాల్లో హోర్డింగ్‌లు, వాల్‌ పెయింటింగ్‌లు, డిజిటల్‌ బోర్డులను ఏర్పాటుచేస్తున్నారు. అలాగే, మొబైల్‌ వ్యాన్లతో నిత్యం అవగాహన కల్పించనున్నారు. కరోనా నియంత్రణపై ప్రచారానికి ఆడియోలు, కరపత్రాలు, బ్రోచర్లను వినియోగించడంతో పాటు స్థానిక కేబుల్‌ ఆపరేటర్ల మద్దతు కూడా తీసుకుంటారు.

LEAVE A REPLY

Please enter your comment!
Please enter your name here