IPL 2020: ‘నిజాయతీగా చెబుతున్నా.. నా దగ్గర సమాధానాల్లేవ్’.. రాహుల్ ఒప్పుకోలు
IPL 2020: ‘నిజాయతీగా చెబుతున్నా.. నా దగ్గర సమాధానాల్లేవ్’.. రాహుల్ ఒప్పుకోలు

కోల్‌కతా నైట్ రైడర్స్‌తో మ్యాచ్‌లో కింగ్స్ ఎలెవన్ పంజాబ్ 2 పరుగుల తేడాతో ఓడటం అందర్నీ ఆశ్చర్యపరిచింది. అద్భుతంగా ఆడుతున్న కెప్టెన్ రాహుల్ క్రీజ్‌లో ఉండటంతో.. 18 బంతుల్లో 22 రన్స్ చేయడం పెద్ద కష్టం కాదనుకున్నారంతా. కానీ కోల్‌కతా సంచలనం సృష్టించింది. అందర్నీ విస్మయానికి గురి చేస్తూ.. థ్రిల్లింగ్ విక్టరీని సొంతం చేసుకుంది. ఈ మ్యాచ్‌లో రాహుల్ (74), మయాంక్ (56) తొలి వికెట్‌కు 115 రన్స్ చేసినా.. పంజాబ్ 165 పరుగుల లక్ష్యాన్ని చేధించలేకపోయింది.

మ్యాచ్ ముగిసిన అనంతరం కేఎల్ రాహుల్ మాట్లాడుతూ… మేం బాగానే బ్యాటింగ్ మొదలుపెట్టాం, లక్ష్యానికి చేరువయ్యాం. కానీ నిజాయతీగా చెప్పాలంటే.. నా దగ్గర సమాధానాల్లేవని అంగీకరించాడు. మా బౌలర్లు రాణించి 180 పరుగుల్లోపే ప్రత్యర్థిని కట్టడి చేశారు. అయినా రన్ ఛేజ్‌లో మేం నెగ్గలేకపోయాం అని వ్యాఖ్యానించాడు.

ఏడు మ్యాచ్‌ల్లో ఆరు ఓటముల తర్వాత కెప్టెన్ రాహుల్, కోచ్ అనిల్ కుంబ్లే కచ్చితంగా కొన్ని ప్రశ్నలకు ఫ్రాంచైజీకి సమాధానం చెప్పాల్సి ఉంటుంది. జాంటీ రోడ్స్ లాంటి ఫీల్డింగ్ కోచ్, వసీం జాఫర్ లాంటి బ్యాటింగ్ కోచ్, అండీ ఫ్లవర్ లాంటి అసిస్టెంట్ కోచ్ ఉన్నా.. తమ జట్టు ఎందుకు ఓడుతుందనే ప్రశ్న ఫ్రాంచైజీ నుంచి కచ్చితంగా వస్తుంది.

‘‘ఇప్పటి వరకూ జరిగిన ఏడు మ్యాచ్‌ల్లో ఒక్కసారి కూడా క్రిస్ గేల్‌ను ఎందుకు బరిలో దింపలేదు..? ఒక్క మ్యాచ్‌లో విఫలం కాగానే క్రిస్ జోర్డాన్‌ను పక్కనబెట్టి.. ఆల్‌రౌండర్ నీషమ్‌కు వరుసగా మూడు మ్యాచ్‌ల్లో ఛాన్స్ ఎలా ఇచ్చారు..? కోల్‌కతాతో జరిగిన మ్యాచ్‌లో మ్యాక్స్‌‌వెల్‌ కంటే ముందే సిమ్రాన్ సింగ్‌ను ఎందుకు బ్యాటింగ్‌కు పంపారు..? 74 పరుగులు చేసిన రాహుల్.. సాధించాల్సిన లక్ష్యమేమంత కష్టం కాకపోయినా.. ఎందుకు చివర్లో ఔటై పెవిలియన్ చేరాల్సి వచ్చింది..?’’ లాంటి ప్రశ్నలను కింగ్స్ ఎలెవన్ పంజాబ్ యాజమాన్యం కోచ్, కెప్టెన్లకు సంధించే అవకాశం ఉంది.

సగం మ్యాచ్‌ల్లో ఒక్క విజయమే సాధించిన పంజాబ్.. మిగతా సగం మ్యాచ్‌ల్లో ప్రతి దాంట్లో గెలుపే లక్ష్యంగా ఆడాల్సి ఉంటుంది. లేదంటే ఆ జట్టు ప్లేఆఫ్స్ రేసు నుంచి ముందే నిష్క్రమించడం ఖాయం. గతంలో ముంబై, చెన్నై లాంటి జట్లు మాత్రమే ఇలాంటి పరిస్థితుల్లో నుంచి ప్లేఆఫ్స్‌కు చేరుకున్నాయి. ఒకవేళ పంజాబ్ ఆత్మశోధన చేసుకొని.. వరుస విజయాలు సాధిస్తే మాత్రం అది నిజంగా అద్భుతమే.

LEAVE A REPLY

Please enter your comment!
Please enter your name here