క్యాన్సర్‌తో ఆర్మీ అధికారి మృతి.. బెంగళూరు-అమృత్‌సర్ తల్లిదండ్రుల రోడ్డు ప్రయాణం

కల్నల్ నవజ్యోత్ సింగ్ బాల్.. ఆర్మీలో స్పెషల్ ఫోర్సెస్ ఆఫీసర్. సిన్సియర్ అధికారిగా పేరొందిన ఆయన అరుదైన క్యాన్సర్ కారణంగా ఏప్రిల్ 9న ప్రాణాలు కోల్పోయాడు. కల్నల్ ఎన్ఎస్ బాల్‌ అని ఆర్మీలో అందరూ పిలుచుకునే ఈ ఆఫీసర్ అత్యున్నత సైనిక పురస్కారాల్లో ఒకటైన శౌర్యచక్ర పురస్కారాన్ని సైతం పొందారు. 2018లో ఆయన కుడి చేతిపై క్యాన్సర్ కణితి వచ్చింది. కీమోథెరపీ చేయించుకుంటూనే ఆయన విధుల్లో కొనసాగారు. 2019 జనవరిలో ఆయన కుడిచేతిని తొలగించారు. కానీ క్యాన్సర్ మహమ్మారి శరీరంలోని ఇతర భాగాలకు వ్యాపించింది. ఊపిరితిత్తులు, కేన్సర్, కాలేయం లాంటి కీలక అవయవాలకు క్యాన్సర్ విస్తరించింది. రెండేళ్లపాటు క్యాన్సర్‌తో పోరాడిన ఆయన చివరకు ప్రాణాలు వదిలారు. ఆయన మరణం పట్ల ఆర్మీ వర్గాలు ప్రగాఢ సానుభూతి వ్యక్తం చేశాయి. బెంగళూరు హాస్పిటల్‌లో చికిత్స పొందుతూ చనిపోగా.. మరణించే ముందు రోజు కూడా చిరునవ్వు నవ్వుతూ ఓ ఫొటో దిగడం ఆయన ఆత్మస్థైర్యాన్ని ప్రతిబింబిస్తోంది.

కల్నల్ ఎన్ఎస్ బాల్‌ (39) సొంతూరు పంజాబ్‌లోని అమృత్‌సర్. ఆయన తండ్రి కేఎస్ బాల్ లెఫ్టినెంట్ కల్నల్‌గా పని చేసి రిటైర్ అయ్యారు. అంత్యక్రియల కోసం ఎన్ఎస్ బాల్ మృతదేహాన్ని హెలికాప్టర్ ద్వారా బెంగళూరు నుంచి పంపిస్తామని ఆర్మీ అధికారులు ఆయన తల్లిదండ్రులకు కబురు పంపారు. కానీ వారు మాత్రం తమ కొడుకు అంత్యక్రియలను బెంగళూరులోనే నిర్వహించాలని భావించారు.

దేశవ్యాప్తంగా లాక్‌డౌన్ అమల్లో ఉండటంతో ఆర్మీ సర్వీసెస్ ఎయిర్‌క్రాప్ట్‌ సమకూరుస్తే.. బెంగళూరు వస్తామని చెప్పారు. కానీ నిబంధనలు ఇందుకు ఒప్పుకోవని ఆర్మీ అధికారులు స్పష్టం చేశారు. భద్రతా బలగాలు, పోలీసు బలగాల్లో పని చేసే వారి కుటుంబ సభ్యులకు ఎయిర్‌క్రాఫ్ట్ సేవలను అందించడం కుదరదని తెలిపారు. అంతే కాదు.. మిలటరీ ఎయిర్‌క్రాఫ్ట్‌లు తక్కువ సంఖ్యలో అందుబాటులో ఉన్నాయని బదులిచ్చారు.

దీంతో చేసేదేం లేక కల్నల్ తల్లిదండ్రులు బెంగళూరుకు 2600 కి.మీ.పైగా దూరం రోడ్డు మార్గంలో ప్రయాణం ప్రారంభించారు. హెలికాప్టర్ ద్వారా వెళ్లడానికి ఆర్మీ నిబంధనలు ఒప్పుకోకపోయినప్పటికీ.. వారికి మాత్రం భద్రతా బలగాలు దారి పొడవునా సహకరిస్తున్నాయి. ఈ విషయాన్ని ట్విట్టర్ ద్వారా వెల్లడించిన వారు.. శనివారం రాత్రికి బెంగళూరు చేరుకునే అవకాశం ఉందన్నారు.

ఆర్మీలో అత్యంత నిబద్ధతతో పని చేసిన ఓ కల్నల్ చనిపోతే.. కడసారి తమ కొడుకును చూడటానికి వెళ్తున్న అతడి తల్లిదండ్రులకు హెలికాప్టర్ సమకూర్చడానికి నిబంధనలు అడ్డు రావడం పట్ల పలువురు మండి పడుతున్నారు. నిబంధనలను శిలలపై రాయరు, ప్రత్యేక సందర్భాల్లో వాటిని మార్చుకోవాలని గతంలో ఆర్మీలో పని చేసిన వారు అభిప్రాయపడుతున్నారు. కనీసం వారి వయసునైనా దృష్టిలో ఉంచుకోవాల్సింది అంటున్నారు.